موكووووس على متعووووس

موكوس على متعوس

لقيت فانوس مرة ودعكته طلعلى عفريت… شبيك لبيك
قلت أنا للذل باى باي ودعته وللعفريت هاهريك هاهريك
قالى هأوأو يا إبن الناس دانا عفريت مارد بن جان
ما يهمني مكان وزمان واطلب وأنا عندى البرهان
قلت أخيرا اعيش مرتاح بعد تعاسة طول زمان
*****************
أناعاوز قمح زُرع بالمصر ومرتب يكفى لآخر الشهر
وحكومة متعصرنيش عصر ومسؤولين يبطلوا فشر
وعاوز عيش من غير طوابير وإنفاق حكومى بدون تبذير
وانتخابات من غير تزوير ورئيس سابق أشوفه كتير

*****************
عاوز فى بيتى شيكارة دقيق وتبرير مقنع لأى حريق
ومجلس شعب بدون تصفيق وبكأس العالم لينا فريق

وأكلة كباب مشوى على السيخ مع عيالى بشرم الشيخ
وأشرب فى القسم عصير بطيخ وأخرج سليم بدون تلطيخ

ونفسى الضحكة ترجع تانى ورصيف للمشى أنا وخلاّنى
وجنيه مصرى زى البرانى يشترى حتة لحمة ضانى

*****************
رد العفريت عليا بغشم وقال يا مصرى ماكنش العشم
بص.. أنا ممكن أشيل الهرم واسدلك الأوزون اللى اتخرم
وأرجعلك الأكل اللى اتهضم وتمأمأ البقرة كأنها غنم
أبنيلك قصر من العدم وأقولك معنى شرم برم
بس طلباتك طلبات ملموس عقله خلاص أكله السوس
ده تخطيط يا بنى ومدروس إنك تعيش على طول موكوس
وأحنا بناخد منكوا دروس إزاى يبقى الجن متعوس
ويا ريت ترجعنى تانى الفانوس وأنا راضى أعيش محبوس
بدل ما أخرج واتبهدل زيك ويتلم موكوس على متعوس